तेजन्यूजहेडलाईन्सचा दुसरा वर्धापण दिना निमित्त सर्व वाचकांना हार्दिक शुभेच्छा!

Thursday, 29 August 2019

'तुमचा जनादेश हाच आशीर्वाद' : मुख्यमंत्री देवेंद्र फडणवीस





सेलू, दि.२९ / प्रतिनिधी : तुमचा जनादेश हाच आशीर्वाद समजून मुंबईला जातो. महाराष्ट्राच्या विधानसभेवर भाजप महायुतीचा झेंडा लावतो आणि तुमचा आशीर्वाद घेण्याकरिता पुन्हा परत येतो, अशी भूमिका मांडण्यापूर्वी तुमचा जनादेश आहे ? आशीर्वाद आहे ? सर्वांना आहे ? असं मागणं मागत मुख्यमंत्री देवेंद्र फडणवीस यांनी गुरुवारी (२९ ऑगस्ट) सेलू (जि.परभणी ) येथील सभेत उपस्थितांकडून मोठ्या आवाजात होकार मिळवला आणि पुन्हा सत्तेवर येण्याचा जबरदस्त आत्मविश्वास व्यक्त केला.

पाथरी रस्त्यावरील बोर्डीकर मैदानावर दुपारी अडीच वाजता महाजनादेश यात्रेनिमित्त मुख्यमंत्री देवेंद्र फडणवीस यांची सभा झाली. यावेळी पाणी पुरवठा व स्वच्छता मंत्री बबनराव लोणीकर, माजी आमदार रामप्रसाद बोर्डीकर, मेघना बोर्डीकर, विठ्ठलराव रबदडे,  अभय चाटे, संजय साडेगावकर, जयप्रकाश बिहाणी, डॉ.समीर दुधगावकर, डॉ.माधवराव सानप, डॉ.प्रफुल्ल पाटील, डॉ.ऋतुराज साडेगावकर, खंडेराव आघाव, सुरजीतसिंह ठाकूर, रवींद्र डासाळकर, नगराध्यक्ष विनोद बोराडे आदींची व्यासपीठावर प्रमुख उपस्थिती होती.

फडणवीस म्हणाले,  " हे गोरगरीब, शेतकरी, शेतमजूरांचं, सामान्य माणसांकरिता काम करणारं सरकार आहे. अन्न, वस्त्र, निवारा आणि शिक्षणाबरोबरच रोजगाराच्या संधी निर्माण करण्याचं काम सरकारने केले आहे. सर्व समाजाला सोबत घेऊन पुढे जाण्याचा आमचा प्रयत्न आहे. मराठा समाजाला आरक्षण दिलं. धनगर समाजाला हजार कोटींच्या योजना, ओबीसींसाठी स्वतंत्र मंत्रालय तयार करून दरवर्षी तीन हजार कोटी रुपये ओबीसींच्या कल्याणासाठी आणि अल्पसंख्याकांकरिता मोठ्या प्रमाणावर निधी उपलब्ध करून दिला आहे."
शिक्षणात तेराव्या- चौदाव्या क्रमांकावर असलेला महाराष्ट्र या चार वर्षांत तिसऱ्या क्रमांकावर आहे. लवकरच पहिल्या क्रमांकावर येईल. चांगलं दर्जेदार शिक्षण दिले जातेय. त्यामुळे खासगी शाळासोडून एक लाख विद्यार्थ्यांनी जिल्हा परिषदेच्या शाळेत प्रवेश घेतला आहे.
आरोग्याकरिता प्रधानमंत्री व मुख्यमंत्री जन आरोग्य योजनेच्या माध्यमातून लाखोंची ऑपरेशन झाली. चाळीस लाख रूग्णांना औषधोपचार दिले गेले आहेत.
पाच वर्षांत तीन लाखांवरून चाळीस लाख कुटुंब बचत गटाला जोडले गेले आहेत.  महिलांना रोजगार उपलब्ध करून दिला आहे. मायमाऊल्यांच्या हातात दोन पैसे आले, तर त्या घराच्या कामात लावतात. पै-पै वाचवून मुला-मुलींच्या करिता वापरतात, मात्र भावांच्या हातात पैसे पडले, तर व्यसनात, तंबाखूत जातात. त्यामुळे मायमाऊल्यांचं सक्षमीकरणाच्या दृष्टीने हे सरकार काम करत आहे.
आज मोदीजींच्या नेतृत्वात जसं एका मजबूत भारत राष्ट्राची निर्मिती होत आहे. तसं मजबूत आणि समृद्ध महाराष्ट्र तयार करण्यासाठी आपल्या जनादेशाची गरज आहे. तो प्राप्त करण्यासाठी आलो असल्याचे मुख्यमंत्र्यांनी यावेळी नमूद केले
दरम्यान, यावेळी अपेक्षेप्रमाणे सेलूचे नगराध्यक्ष विनोद बोराडेंनी आपल्या समर्थक नगरसेवकांसह तसेच तालुक्यातील विविध गावांतील अन्य पक्ष, संघटनेच्या  पदाधिकारी, कार्यकर्त्यांनी यावेळी भारतीय जनता पक्षात प्रवेश केला.
प्रास्ताविक मेघना साकोरे- बोर्डीकर यांनी केले. सूत्रसंचालन सुभाष मोहकरे यांनी केले. सभेला नागरिक मोठ्या संख्येने उपस्थित होते.

...आता आचारसंहिता लागणार

यावेळी मोठ्या प्रमाणावर विविध मागण्यांची निवेदन आली. त्यावर बोलतांना मुख्यमंत्री म्हणाले, सरकार आल्यावर सर्वच निवेदनाचा अधिकाराने समाधान करील.  सेलू तालुक्यातील सर्व प्रलंबित प्रश्न मार्गी लावण्यात येतील. पण आता आचारसंहिता लागणार आहे, असे नमूद करत लवकरच विधानसभेच्या निवडणुका जाहीर होतील असे संकेतच दिले.

फोटो : सेलू ( जि.परभणी ) येथील महाजनादेश यात्रेनिमित्त गुरूवारी अभिवादन करतांना मुख्यमंत्री देवेंद्र फडणवीस, बबनराव लोणीकर, मेघना बोर्डीकर
...

╭════════════  वृत्तांकन :
बाबासाहेब हेलसकर,
सेलू-परभणी
-------------------------------
संपर्क सूत्र : व्हाॅट्स अॅप : 9881525510  ▌
                   ╰════════════╯

No comments:

Post a Comment